एम्बुलेन्सबाट गाँजा ओसार्ने तीन जना पक्राउ

एम्बुलेन्सबाट गाँजा ओसार्ने तीन जना पक्राउ

मकवानपुर, हेटौंडा उपमहानगरपालिका–१९ बाट एम्बुलेन्समा लुकाई छिपाई ल्याएको करिब ३० किलो ६ सय ग्राम अवैध लागूऔषध गाँजा र नगद १ लाख रुपैयाँ सहित ३ जनालाई शनिबार साँझ प्रहरीले पक्राउ गरेको छ । 

पक्राउ पर्नेहरुमा एम्बुलेन्सका चालक  रौतहट डुमरीया नगरपालिका–९ बस्ने ३९ वर्षीय महमत खलिद, एम्बुलेन्समा सवार सोही ठाउँ बस्ने १९ वर्षीय अशोक कुमार र भारत बिहारका २२ वर्षीय विनोद सहनी रहेका छन् । 

ईलाका प्रहरी कार्यालय नेवारपानीबाट खटिएको प्रहरीले मनहरीबाट हेटौंडातर्फ आइरहेको बा.२ झ १७४९ नम्बरको एम्बुलेन्स जाँच गर्ने क्रममा उक्त लागूऔषध सहित फेला पारी उनीहरुलाई पक्राउ गरेको हो । 

लागुऔषध नियन्त्रण ऐन, २०३३ बमोजिम दुईदेखि १० वर्षसम्म कैद र १५ हजारदेखि एक लाख रुपैयाँसम्म जरिवाना तथा सवारी साधनसमेत जफत हुने व्यवस्था छ।

यसैगरी मकवानपुर, हेटौंडा उपमहानगरपालिका-१० बाट अवैध लागूऔषध गाँजा करिब १० किलो ५ सय ६० ग्राम सहित  २ जनालाई शनिबार साँझ प्रहरीले पक्राउ गरेको छ । पक्राउ पर्नेहरुमा राक्सिराङ गाउँपालिका(२ बस्ने ४२ वर्षीय कान्छाराम मोक्तान र ३५ वर्षीय ज्ञान बहादुर प्रजा रहेका छन् । जिल्ला प्रहरी कार्यालयबाट खटिएको प्रहरीले ना.७ ख ६९० नम्बरको बस जाँच गर्दा बसमा सवार उनीहरुलाई उक्त लागूऔषध सहित फेला पारी पक्राउ गरेको हो ।