धादिङमा जिप दुर्घटना हुँदा २३ जना घाइते 

 धादिङमा जिप दुर्घटना हुँदा २३ जना घाइते 

धादिङ, १४ कात्तिक । धादिङको गजुरी गाउँपालिका २ मलेखु भण्डारा सडकखण्डस्थित तुनी खोलामा जिप पल्टिँदा २३ जना घाइते भएका छन् । 

बिहीबार ताल्तीबाट मलेखुतर्फ आउँदै गरेको ग१ज ३०११ नम्बरको जिप पल्टिँदा २३ जना घाइते भएका हुन् । जिपमा ३० जना सवार रहेको बताइएको छ ।

कच्ची सडकबाट करीब २५ मिटर तल खोलामा खसेर दुर्घटना भएको जिल्ला प्रहरी कार्यालय धादिङका प्रमुख प्रहरी उपरीक्षक राजकुमार बैदवारले बताए । 

घाइतेको उद्धारपछि राजमार्ग सामुदायिक अस्पताल, मलेखु र गजुरी अस्पतालमा उपचारका लागि लगिएको छ । थप विवरण आउन बाँकी छ ।