newsone

अब गृहमन्त्रीको नजर एनजीओ र आईएनजीओको बेथितिमा

newstwo अब गृहमन्त्रीको नजर एनजीओ र आईएनजीओको बेथितिमा

काठमाडौँ, २४ जेठ । राष्ट्रिय गैरसरकारी संस्था (एनजीओ) तथा अन्तर्राष्ट्रिय गैरसरकारी संस्था (आईएनजीओ) को अनुगमन र नियमनमा अब कडाइ गरिने भएको छ ।

गृहमन्त्रालयमा आज गृहमन्त्री रामबहादुर थापा ‘बादल’, महिला बालबालिका तथा जेष्ठ नागरिक मन्त्री थममाया थापा तथा दुबै मन्त्रालयका पदधिकारीबीचको बैठकले एनजीओ र आईएनजीओको गतिविधि निगरानी नहुँदा विकृति बढ्दै गएको निश्कर्षसहित यसको नियमनलाई तीव्रता दिने निर्णय गरेको हो ।

हालको नियमनमा कमजोरी रहेको भन्दै अब जिल्ला प्रशासन कार्यालयले समेत नियमन गरी रिपोर्ट पठाउने बैठकमा निर्णय भएको छ ।

बैठकले एनजीओ र आईएनजीओका पदाधिकारीहरुको समेत सम्पत्ति विवरण सार्वजनिक गर्नुपर्ने गरी कार्यविधि बनाउने र त्यसलाई कडाईपूर्वक लागू गर्ने निर्णय गरेको छ ।

पछिल्लो तीन वर्षदेखि दर्ता नविकरण नभएका एनजिओ र आईएनजिओको दर्ताका लागि १५ दिने म्याद जारी गर्ने र सो अवधीमा दर्ता नभए स्वतः खारेज गर्ने समेत निर्णय भएको छ ।

हाल ४७ हजार एनजीओ र दुई सय बढी आईएनजीओ दर्ता भए पनि धेरै एनजीओहरुले वर्षौँदेखि दर्ता नवीकरण गरेका छैनन् ।

यस्तै भ्रष्टाचारमा संलग्न, राजनीतिक गतिविधिमा संलग्न हुने, धर्म प्रचार गर्नेजस्ता कार्यमा संलग्न एनजीओ र आईएनजीओको समेत दर्ता नवीकरण नगर्ने निर्णय आजको बैठकले गरेको छ ।

बैठकले ७७ वटै जिल्लाबाट ती जिल्लामा सञ्चालित एनजीओ र आईएनजीओको विवरण र गतिविधि पठाउन जिल्ला प्रशासन कार्यालयलाई निर्देशन दिएको छ । 

यस्तै समाजकल्याण परिषद्बाट सहमति लिएर गतिविधि गरिरहेका सबै संघसंस्थाको विवरण पठाउन परिषद्लाई निर्देशन दिने निर्णय बैठकले गरेको छ । 

बैठकमा महिला बेचविखन रोक्नका लागि दुबै मन्त्रालयले सहकार्य गरेर अघि बढ्ने सहमति भएको छ ।

यस्तै समाज कल्याण परिषद्को भृकुटीमण्डप लगायतका क्षेत्रमा रहेको भवन तथा जग्गामा वर्षौदेखि बसेका केही व्यवसायी एवम् संघसंस्थाले भाडा बापतको रकम नतिरेको जानकारी परिषद्का पदाधिकारीले बैठकमा गराएपछि भाडा नतिर्नेहरुलाई हटाउन गृह मन्त्रालयले सहयोग गर्ने निर्णय भएको छ ।


अमेरिका तथा छिमेकी भारत र चीनमा समेत एनजीओ र आईएनजीओका गतिविधिमाथि अंकुश लगाइए पनि नेपालमा भने यस्ता संघसंस्था मौलाउँदै गएको छ । 


 
 

newsthree

प्रतिकृया दिनुहोस्

newsfour
newsfive